APA-Zaqatala

Məlumatda bildirilir ki, öldürülən yaraqlının üzərində hər hansı sənədin olmaması onun şəxsiyyətinin müəyyənləşdirilməsində çətinlik yaradıb. Lakin bununla belə, həmin şəxsin orta yaşlarda kişi olduğu bildirilir. Öldürülən yaraqlının saqqallı olması isə onun hansısa radikal dini qruplaşmanın üzvü olduğunu söyləməyə əsas verir. Hazırda əməliyyatçılar onun hansı ölkənin vətəndaşı olması və şəxsiyyətinin müəyyənləşdirilməsi istiqamətində araşdırma aparır.

Faktla bağlı Respublika Baş Prokurorluğunun Ağır Cinayətlərə Dair İşlər üzrə İstintaq İdarəsi tərəfindən cinayət işi başlanıb, araşdırma aparılır.

Hadisə zamanı yaralanan Zaqatala Sərhəd Dəstəsinin əsgəri, 1990-cı il təvəllüdlü Bəhruz Əsgər oğlu İsayev isə Balakən Mərkəzi Rayon Xəstəxanasına yerləşdirilib. Xəstəxananın baş həkimi Akif Uluxanovun APA-ya verdiyi məlumata görə, B. İsayev ayağından aldığı güllə yarası ilə bu gecə saat 05.00 radələrində xəstəxanaya çatdırılıb. Güllə əsgərin sağ ayağının pəncəsini dağıdıb. Dərhal əməliyyat olunan B. İsayevin vəziyyəti hazırda kafi qiymətləndirilir. Xatırladaq ki o, Sumqayıt şəhər Hərbi Komissarlığından həqiqi hərbi xidmətə çağırılıb.

Qeyd edək ki, iyulun 15-dən 16-na keçən gecə Azərbaycanın Balakən rayonu ərazisində Rusiya, Azərbaycan və Gürcüstan sərhədi sayılan Qubek dağlarında yerləşən “Üç nöqtə” adlanan ərazidə Azərbaycan sərhədçiləri ilə dövlət sərhədini pozmağa cəhd göstərən silahlı şəxslər arasında atışma olub. Dövlət sərhədini qanunsuz keçərək sərhədçilərin əmrinə tabe olmayan dəstə üzvləri onlara atəş açaraq bir əsgəri yaralayıblar. Müqavimət göstərən silahlı dəstə üzvlərindən biri öldürülüb, digər beş nəfər isə qaçmağa müvəffəq olub.

Hazırda Balakən rayon Polis Şöbəsinin, rayon Prokurorluğunun əməkdaşları, Daxili Qoşunların və Zaqatala Sərhəd Dəstəsinin əsgərləri qaçmağa müvəffəq olmuş sərhəd pozucularının tutulması üçün əməliyyatlar həyata keçirir.