Zaqatala. Hafiz Heydərov-APA. Fransanın
Azərbaycandakı səfiri Qabriel Keller Zaqatalaya səfər edib. APA-nın Şəki-Zaqatala
bürosunun məlumatına görə, səfir rayon rəhbərliyi ilə rəsmi görüş keçirib və
fransız dili tədris edən orta məktəb müəllimlərinin rayonda keçirilən
təlim-kurslarına qatılıb. Q. Keller icra başçısı Asif Əsgərovla keçirdiyi
görüşdə Azərbaycan və Fransa hökumətləri arasındakı inkişaf edən
münasibətlərdən danışılıb. Görüşdə həmçinin A. Əsgərov səfirə Zaqatalanın
turizm potensialı barədə məlumat verib və rayonda turizmin inkişaf etdirilməsi
istiqamətində qarşılıqlı məsləhətləşmələr aparılıb. Q. Keller Zaqatalaya səfəri
çərçivəsində rayonda fəaliyyət göstərən Heydər Əliyev muzeyinə baş çəkib. Qeyd
edək ki, Zaqatalada Təhsil Nazirliyi və Fransa səfirliyinin təşkilatçılığı ilə
ölkənin ayrı-ayrı regionlarından və paytaxt Bakıdan 50-ə yaxın fransız dilindən
dərs deyən orta məktəb müəllimləri üçün təlim-kursları keçirilir.
