Главная » 2008 » Июнь » 5 » Şəki rayonunda dünya şöhrətli Norveç səyyahı Tur Heyerdalın heykəli qoyulacaq
Şəki rayonunda dünya şöhrətli Norveç səyyahı Tur Heyerdalın heykəli qoyulacaq
22:02:48
Şəki. Hafiz Heydərov - APA. Şəki rayonunun Kiş kəndində, tarixi abidə sayılan Alban məbədi yaxınlığında dünya şöhrətli Norveç səyyahı Tur Heyerdalın heykəli qoyulacaq. Bu barədə APA-nın Şəki-Zaqatala bürosuna Şəki rayon İcra Hakimiyyətindən (RİH) məlumat verilib. RİH-dən bildirilib ki, rayonun bir sıra görməli yerlərində digər görkəmli tarixi şəxsiyyətlərin də heykəlləri ucaldılacaq. Şəki rayonunun Mərkəzi Mədəniyyət və İstirahət Parkında Azərbaycanın gülüş ustaları Lütfəli Abdullayev və Bəşir Səfəroğlunun heykəllərinin qoyulması nəzərdə tutulub. Bundan başqa, Şəkinin qala divarları qarşısında tarixi şəxsiyyət Hacı Çələbi xanın at üstündə heykəli, Xan Sarayı yaxınlığında isə sarayı inşa etdirən Hüseyn Xan Muştağın heykəli ucaldılacaq. Azərbaycan əl yazma sənətinin inkişafında böyük xidmətləri olan Salman Müntazın heykəlinin isə rayonun mərkəzi prospektlərindən birində qoyulması nəzərdə tutulur. RİH-dən bildirib ki, heykəllərin qoyulması istiqamətində görülən işlər artıq başa çatmaq üzrədir.
